ಎಲ್ಲ ಮುಗಿದ ಸ್ಮಶಾನಮೌನವೋ
ಇದಕ್ಕಿಂತ ಮೀರಿದ್ದೇನೂ ಆಗಲಾರದೆನ್ನುವ ವಿಶ್ವಾಸವೋ
ಇಷ್ಟಾದರೂ ಕೈಯಲ್ಲಿ ಅಷ್ಟು ಉಳಿದಿದೆಯೆಂದು ನೆಮ್ಮದಿಯೋ
ನಿನ್ನ ಖುಷಿ ಎಲ್ಲೆ ಮೀರದ್ದನ್ನು ಕಂಡು ಸುಮ್ಮನಾಗುವ ಸ್ವಾರ್ಥವೋ
ಕಣ್ಣಲ್ಲಿ ಒಂದು ಹನಿ ಇಲ್ಲ ಇಂದು
ಕಟ್ಟೆಕೊಚ್ಚಿದ ಪ್ರವಾಹದಂತೆ ಹರಿಯುತ್ತಿದ್ದಿದ್ದೆಲ್ಲ
ಹರಿದು ಸುರಿದು ಖಾಲಿಯಾಗಿಬಿಟ್ಟೆನೇನೋ?

ವೀಣೆಯೆಲ್ಲೋ ತಂತಿಯಾಚೆಗೆ ಮಿಡಿಯುತ್ತಲೇ ಇದೆ
ನನಗಾಗಿ ಕಣ್ಣು ತುಂಬುವುದಿಲ್ಲ ನಿಜ
ನಿನಗಾಗಿ ಎರಡು ಹನಿ
ಯಾವತ್ತಿಗೂ ಇರುತ್ತದೆ